Кошаркарите на Црвена звезда ќе играат четврто финале во низа во АБА лигата. Белграѓани го совладаа Морнар со 88:69 (по четвртини: 26:19, 26:18, 16:19, 20:13) за конечни 2:1 во полуфиналната серија подобар од три со што обезбедија пресметки со Будуќност за тронот во регионалното натпреварување.
„Црвено-белите“ се трикратни освојувачи на АБА лигата и од самиот почеток на сезоната во секоја прилика истакнуваа дека одбрана на титулата и пласман во Евролигата за сезоната 2018/19 се основни цели на екипата.
Полуфиналните судири со тимот од Бар ги почнаа со стил. Лесно го добија првиот со 91:63 по што Морнар возврати на домашен терен со 88:84 и се избори за „мајсторка“. А, во неа шампионот беше подобар ривал во најголем дел, покажа решителност да не препушти ништо на случајот и покрај заканите на Црногорците, особено во третиот период во кој и успеаја да стопат дел од предноста на „црвено-белите“.
Лидер во победничката екипа беше Огњен Добриќ со 19 коша, Тејлор Рочести постигна 18, Ален Омиќ 11, а двоцифрен беше и Матијас Лесор со 10 поени. Најефикасен, пак, на средбата беше гостинскиот кошаркар Немања Врашен со 21 поен.
Пласман во финалето веќе имаше обезбедено Будуќност чии играчи беа подобри во полуфиналната серија со Цедевита, исто така, со 2:1.
Според пропозициите, шампион во АБА лигата ќе биде онаа екипа која ќе стигне до три победи во мечевите за титулата. Финалната серија ќе започне на 9 април, а останатите термини во неа се 10 април и 12 април и доколку биде потребно 13 април и 15 април. Домаќин во двата воведни меча ќе биде Црвена звезда по што серијата ќе се пресели во Подгорица. Евентуалниот петти натпревар ќе се одигра во салата „Александар Николиќ“ во Белград.