Ова е казната што раководството на Евролига ја изрече за турскиот клуб по фрлањето на тврди предмети на терен во мечот од првото коло
За фрлање на тврди предмети на терен во мечот со ЦСКА Москва, Галатасарај ќе плати 12.000 евра. Ова е казна што раководството на Евролига ја изрече за турскиот клуб за инцидентот при крајот на втората четвртина во салата „Абди Ипекчи“ во првото коло од новата сезона.
Незадоволни од техничката грешка што судиите ја „свирнаа“ за тренерот Атаман и организаторот на игра Детмон, навивачите почнаа да фрлаат разни тврди предмети и предизвикаа кус прекин на средбата. Страстите за среќа брзо се смирија и натпреварот продолжи и заврши со убедлив триумф на рускиот тим со 109:84.
Во инцидентот беше погоден и еден претставник на московската екипа на што беше вложена и жалба. По неа расправаше дисциплинската комисија на Евролига и реши парично да го санкционира Галатасарај.
Мечевите од второто коло во Евролигата се при крајот на оваа недела. Галатасарај во петок е повторно домаќин. Во Истанбул ќе отпатува Црвена звезда при чие гостување пред две години беше убиен Марко Ивковиќ, навивач на бекградските „црвено-бели“.