Перо Антиќ го напушти европскиот шампион Фенербахче и се враќа во Црвена звезда чиј дрес го носеше од 2005 година до 2007 година. Македонскиот интернационалец потпиша едногодишен договор со „црвено-белите“ кои веста ја потврдија и преку својата интернет страница.
„Црвена звезда во оваа прилика изразува голема благодарност до Жељко Обрадовиќ и Фенербахче за разбирањето“, порачаа од таборот на белграѓани.
Антиќ се враќа во Белград како трикратен шампион на Европа (две титули со Олимпијакос и една со Фенербахче) и со огромно НБА искуство што го стекна играјќи за Атланта Хоукс. Со своите 210 сантиметри и можноста да игра на позициите крилен центар и центар без сомнение ќе биде од големо значење за Црвена звезда во претстојната сезона.
Покрај Атланта, Фенербахче, Олимпијакос и Црвена звезда, Антиќ настапуваше и за АЕК, Лукоил и Спартак, а кариерата ја започна во Работнички. Со просек од 12 поена и 8,5 скока по натпрвар беше еден од најзаслужните за освоеното четврто место на репрезентацијата на Македонија на Европското првенство во Литванија во 2011 година.