Косово го одложи предавањето на барањето за членство во Организацијата на ОН за образование, наука и култура УНЕСКО, соопшти косовското Министерство за надворешни работи.
-Прагматичната одлука за одлагање на членството на Косово во Интерпол и УНЕСКО се базира врз целосна и блиска координација со САД и другите сојузници, се наведува во соопштението во кое се оценува дека одлагањето придонесува за јакнење на меѓународната позиција на Косово и за промоција на мирот во регионот.
Во соопштението, што го пренесуваат српските медиуми, се додава дека Косово досега стана член на над 60 регионални, европски и светски организации и дека сето тоа е правено во тесна координација со стратешките и историските сојузници на Косово, САД и ЕУ.
Ова уште пред неколку месеци го најави косовскиот министер за надворешни работи Емануел Демај.
Српскиот министер за надворешни работи Ивица Дачиќ и актуелната српска власт повеќепати оваа година ја обвинуваа Македонија дека „и го врти грбот“ на Србија со тоа што тајно договара да гласа за пример на Косово во оваа организација на ОН, сметајќи го како непријателски гест, имајќи предвид дека Белград го смета Косово како дел од Србија.
Токму неодманешните тензии на релација Белград- Скопје започнаа со изјавата на Дачиќ во јули дека Србија направила грешка пред 20 години кога го призна Скопје под името Република Македонија.
-Тоа не беше коректно кон Грција, изјави Дачиќ на прес конференцијата по средбата во Атина со шефот на грчката дипломатија Никос Коѕиас на 10 јули, додавајќи дека „Скопје секогаш имало негативен став кон прашањето за Косово и Метохија“.
Претходно Дачиќ и во јануари во интервју за агенцијата Бета, тој го кажа буквално истиот став:
-Србија направи голема грешка. Цела Европа и светот го користат називот Бивша Југословенска Република Македонија, а ние на нашите браќа Грци им удривме шлаканица и сега очекуваме од Грците да не го признаваат Косово. Македонија ја признавме со тоа што ги навредивме Грците, а Македонците постојано гласаат за Косово. Јас морам да кажам дека сме будали, еве ќе употребам недипломатски израз, рече Дачиќ.
Тензиите ескалираа во август кога Белград без објаснување до македонските власти ги повика на консултации вработените во српската амбасада во Скопје.
Подоцнежното објаснување од Белград на средбата на министрите за надворешни работи Никола Димитров и Дачиќ во Ниш беше дека настаните немаат врска со Косово туку со случај на следење и прислушување на персоналот, што беше отфрлено од македонските власти.