По барањето за одговор поднесено од страна на ВМРО-ДПМНЕ кон портпаролката на Европската комисија, Маја Коцијанчиќ, следува одговор.
Коцијанчиќ од Брисел соопшти дека со формирањето на што е можно поширока политичка влада се мисли на потребата да се има широк политички консензус и широка коалиција, со што земјата ќе може ефикасно да се справи со многу предизвици кои и следат.
Спроведувањето на Итните реформски приоритети, Договорот од Пржино и решавање на билатералните прашања бараат силна посветеност од сите политички партии.
„Сите големи партии се согласуваат за реформската агенда за интеграција во ЕУ и дека патот кон ЕУ е стратешка цел на земјата. Ако тие работат заедно кон оваа заедничка цел, ќе имаат де факто уставно мнозинство што е важно за патот на европската интеграција. И поради тоа, ЕУ ги поздравува тековните напори на претседателот Иванов да се сретне и да ги вклучи во процесот сите политички партии“, се вели во соопштението од Коцијанчиќ.
ВМРО-ДПМНЕ вчера го повика Брисел, односно портпаролката Коцијанчиќ јавно да објасни врз кој дел од Уставот на Македонија, ЕУ очекува претседателот Иванов да определи лидер за формирање на „што е можно поширока Влада“.
ВМРО-ДПМНЕ вчера побара одговор и од Американската амбасада во Македонија јавно да каже дали е против нови избори, што е идеја на партијата со која раководи Никола Груевски, откако не успеа да договори влада.