Откако портпаролката на Европската комисија, Маја Коцијанчиќ го пренесе ставот на ЕУ дека Македонија нема време за губење, ВМРО-ДПМНЕ реагира дека Коцијанчиќ треба да објасни на основа на кој дел од Уставот на Р. Македонија, ЕУ очекува Претседателот Иванов да определи лидер за формирање на „што е можно поширока Влада“.
– Пожелно е одговорот на ЕУ, исто така да биде јавен, порачува ВМРО-ДПМНЕ.
Оттаму велат, секоја држава, особено источно европските земји, има потреба од континуирани реформи преку промени на законите, за кои понекогаш е потребно и поголемо мнозинство како што е двотретинското кое во Македонија е неопходно за промена на некои закони.
– Сепак, земјите ретко составуваат влади со двотретинско мнозинство. Дури и во таква ситуација некои од нив понекогаш преку разговори и дебата со опозицијата во парламентот успеваат заеднички да изгласаат закони за чие прифаќање треба поголемо мнозинство во парламентот отколку тоа што го има владеачката коалиција. Такви случаи имаше многупати и во Македонија, кога владеачката гарнитура успеваше за некои реформски закони да обезбеди поддршка во парламентот од опозицијата, што говори дека и без двотретинско мнозинство може да се прават реформи, се вели во соопштението на партијата.
ВМРО-ДПМНЕ прашува дали ЕУ има воспоставена пракса при секое формирање на влада во земјите членки на ЕУ и кандидатите за членство, јавно повикува на создавање на „што е можно поширока Влада“, или тоа е само исклучок за Македонија.
Претходно партијата упати прашање и до Амбасадата на САД, дали таа е против идејата на ВМРО-ДПМНЕ за одржување на нови избори.