Унгарската Влада соопшти дека нема да прави никакви отстапки за Централноевропскиот Универзитет, основан од американскиот финансиер Џорџ Сорос, чиј правен статус повеќе од една година не е решен поради промена во Законот за високо образование.
– Во Унгарија законот важи за сите, вклучувајќи го и Соросовиот Универзитет, изјави портпаролот на унгарската Влада, Золтан Ковач, во интервју за дневниот весник „Маѓар Хирлап“.
Ковач истакна дека „никој не може да ужива привилегии“.
– Ако останатите странски универзитети можат да ги исполнат условите барани според законот, тогаш и Централноевропскиот Универзитет мора да ги исполни, наместо од тоа да прави политичко прашање, истакна портпаролот Ковач.
Во април лани, Унгарија усвои закон со кој би можело да дојде до затворање на Универзитетот на Средна Европа, кој во 1991 година во Будимпешта го основаше американскиот милијардер Џорџ Сорос.
Новиот закон беше усвоен по брза постапка со 123 гласа „ЗА“ и 38 „против“.
Пред една година Будимпшта му даде една година рок на ЦЕУ да се прилагоди на новиот контроверзен закон за високо образование.
Според критичарите, тој е донесен за да може унгарската влада на Виктор Орбан да го затвори овој универзитет финансиран од милијардерот Џорџ Сорос.
Во мај годинава, Сорос објави дека ги затвора канцелариите на фондацијата отворено општество во Будимпешта и заминува во Берлин, како одговор, на како што го, нарече зголемен „репресивен политички и законски амбиент во Унгарија“.