Во размена на прашање и одговор со пратеничката од ВМРО-ДПМНЕ Рашела Мизрахи на денешната седница на Собранието за пратенички прашања, премиерот Димитар Ковачевски рече дека ќе го информира бугарскиот колега Петков за намера на Македонија за отворање културен клуб во Бугарија.
„Ќе го информирам премиерот Петков дека имаме намера да отвориме нов културен клуб на Македонија во Бугарија, овојпат во Благоевград, а името ќе го договориме со нашиот Институт за историја“, рече Ковачевски.
Во врска со обвинувањето дека Владата не реагирала на бугарскиот клубот во Битола што го носи името на Ванчо Михајлов, Ковачевски и рече на Мизрахи: „Мене ме прашувате за Ванчо Михајлов а во Белата палата ви стојат негови слики“!
Мизрахи на денешната седница за пратенички прашања рече дека отворањето на клубот било понижувачко и дека на него присуствувал цел државен врв на Бугарија кој го негира нашиот идентитет, а Владата не прави ништо и нема никаков одговор на ваквите провокации.
Премиерот Ковачевски од говорницата одговори дека за него Ванчо Михајлов е поврзан со директна соработка со фашистички и нацистички режим, негативен лик кој направил огромна штета на македонскиот народ, човек кој учествувал во ликвидација на македонски револуционери и соучесник во режимот кој ги депортирал македонските Евреи во логорите на смртта.
„Како се чувствувам за отворањето на клубот со негово име – нималку добро. Мојот став за ликот и делото на Вачно Михајлов е ист, не е променет и кога неговата биста беше поставена во музејот во Ново Село, Штип, со говор на вашиот почесен претседател Никола Груевски. Ист е и кога неговата фигура беше поставена во Музејот во Скопје како дел од криминалниот проект на Груевски и вашата партија ‘Скопје 2014’. Незнам дали само го имате на сликите во вашате Бела палата, тоа само вие го знаете. Но знам дека токму ВМРО-ДПМНЕ од своите почетоци е наследник на Ванчо Михајлов, а тоа е срамно и недозволиво. Исто како што и ваши членови беа на отворањето на клубот во Битола. Срамно е што во вашиот статут и грб се повикувате на континуитетот на Тодор Александров и Протоѓеров за кого редовно пеете песни. Имено, нивниот ученик Ванчо Михајлов ги организираше нивните ликвидации, како што сложно тројцата претходно учествувале во ликвидација на левичарски револуционери. И сега вие мене ме прашувате за Ванчо Михајлов, па свртете се околу вас во вашиот бел дворец, видете ги сликите. Прашајте ги вашите ветерани и тие ќе ви кажат дека тие го слават Ванчо Михајлов, а не јас ниту СДСМ, ниту најголем дел од нашите граѓани“, рече Ковачевски.