„Сакам да упатам искрена благодарност до сите наши пријатели во ЕУ за нивната поддршка и посветеност за европската интеграција на Република Северна Македонија. Нивната заложба беше клучна за ние денес тука во Брисел да го направиме првиот чекор до членство во ЕУ“, изјави премиерот Димитар Ковачевски по четирпартитната средба со претседателката на Европската комисија Урсула фон дер Лајен, премиерот на Чешка Петр Фиала и албанскиот колега Еди Рама.
Во изјавата Ковачевски упати и честитки за почеток на преговорите на Албанија, до премиерот Еди Рама и до албанскиот народ. „Ова е нов почеток за регионот кој ќе значи просперитет и напредок, продолжуваме понатаму со иста динамика на регионална соработка. Работиме за нас самите но и за забрзување на процесот на интеграција во ЕУ“, рече Ковачевски.
„Огромно е задоволството што по 17 години чекање денес почнуваме преговори, отвораме нови перспективи за граѓаните и полека но сигурно се приклучуваме кон европското семејство, што е наша стратешка цел“, истакна тој.
Осврнувајќи се на францускиот предлог, македонскиот премиер рече дека тој е добар и ги штити македонските црвени линии и македонскиот јазик.
„Европскиот предлог е најдоброто за нас, ги штити нашите црвени линии, воедно е заштитен и македонскиот јазик без никакви дополнувања и објаснувања. Се отвора вратата за нашиот македонски јазик да стане еден од официјалните јазици на ЕУ, што е најголем успех за нас. Не е само заштитата на јазикот туку тој ќе доживее и промоција пред многу земји и култури кои немаат допирни точки со македонскиот јазик и ќе го слушнат. Автеничниот македонски јазик и во ЕУ ќе ја направи побогата и ќе придонесе за обединување на различностите“, нагласи премиерот.
Досега, рече Ковачевски, многу пати докажавме дека сме партнери од доверба на ЕУ. „Така и продолжуваме да работиме. Очекуваме најбрза интеграција на земја членка во ЕУ како што имавме и за НАТО“, порача македонскиот премиер. Ако по утрото се познава денот, овој ден ќе биде историски, ден со кој ќе се гордееме, рече Ковачевски.
Честитки за отворањето на преговорите упати и премиерот Петр Фиала, а посебна честитка до Фон Дер Лајен беше упатена од албанскиот премиер Еди Рама по повод нејзиниот роденден денес.
Рама се заблагодари и на францускиотн претседател Емануел Макрон, за деблокирањето, како што рече, на една апсурдна ситуација. (С.К.)