Премиерот Димитар Ковачевски, на прес-конференција ги образложи новите одлуки од денешната владина седница, со кои се овозможува на компаниите што произведуваат основни прехранбени производи, основните и средни јавни училишта, јавните претпријатија за водоснабдување и одведување на отпадни води, да склучат договор со ЕСМ Продажба и да имаат поевтина струја.
„Ќе обезбедиме поевтина струја од 80 евра по мегават/час за компаниите кои вршат производство на основните прехранбени производи. Со овие мерки компаниите, производителите на основни прехранбени производи ќе имаат предвидливост, стабилна и поевтина струја, што ќе влијае и врз стабилизирање на цените на производите на овие компании“, рече тој.
Ковачевски потсети и дека беше јавно соопштено од производителите на основни производи дека со ваква одлука цените треба да се намалат за најмалку 10 отсто.
„Во оваа тешка криза им помагаме и на основните и на средните јавни училишта. За да имаат непречено и сигурно снабдување со евтина струја основните и средните јавни училишта при прогласена кризна состојба во снабдувањето со електрична енергија може да склучат договор за снабдување со ЕСМ Продажба, по цена од 95 евра по мегават/час“, рече тој.
Премиерот дополни и дека е обезбедена и можност за снабдување со електрична енергија од ЕСМ за јавните претпријатија за водоснабдување и отпадни води кои работат со пумпни и пречистителни станици по цена од 95 евра за мегават/ час електрична енергија.
„Со цел да се спречат злоупотреби и манипулации при обезбедување на универзална услуга на пазарот на електрична енергија, Владата донесе одлука со која на општините и на Градот Скопје им се забранува да основаат јавно претпријатие, друштво со ограничена одговорност или акционерско друштво за вршење дејност од јавен интерес-јавно осветлување. Оваа одлука е донесена поради тоа што сознанијата велат дека општините основале јавни претпријатија или дејности јавно осветлување или ја доделиле на постоечките јавни претпријатија“, објави Ковачевски.
Тој потсети и дека Владата ќе продолжи да ја субвенционираме струјата со 80 отсто за над 600.000 домаќинства и 72.000 мали потрошувачи фирми кои вработуваат 98 отсто од вработените во државата и дека и понатаму, и 42.000 граѓани од најранливи категории, ќе добиваат директна финансиска помош, а 330.000 пензионери покрај зголемените пензии ќе добијат 3.000 односно 6.000 денари поддршка согласно последниот пакет антикризни мерки.