Претседателот на Владата на Република Северна Македонија, Димитар Ковачевски, покрај програмата за неговата официјална посета на Република Бугарија, имаше уште неколку активности во Софија, меѓу кои и средба со Бојко Борисов и раководството на партијата ГЕРБ.
На средбата, премиерот Ковачевски истакна дека Северна Македонија и Бугарија започнуваат еден нов процес на соработка со цел на нејзино интензивирање и продлабочување.
Ковачевски на средбата нагласи дека Владата на Северна Македонија е подготвена за видливи и мерливи резултати од реалниот интерес на граѓаните кои се фокусираат на враќање на довербата меѓу двата народа за да се реафирмираат пријателските односи и да се поттикне политичкиот дијалог за решавање на чувствителните прашања што се отворија меѓу двете земји.
За таа цел на денешната заедничка седница, рече премиерот Ковачевски на средбата со Борисов, се формирани работните групи за повеќе одделни области кои утврдија акциски планови за најважните приоритети, како на пример Коридорот 8.
Ковачевски на средбата со Борисов истакна дека очекува оваа партија, иако сега е во опозиција, да продолжи со политиките за поддршка на Северна Македонија во нејзините аспирации за членство во ЕУ.
Борисов, пак, потенцираше дека треба да се искористи придвижениот процес за надминување на разликите за да се врати довербата како придонес кон европските интеграции на Северна Македонија.