Во рамки на денешниот самит на Отворен Балкан, премиерот Димитар Ковачевски заедно со лидерите од регионот, одржаа прес-конференција, на која што испратија порака дека како држави и како влади заеднички ќе се справуваат со кризата за храна и енергенси во претстојниот зимски период.
„Зимата која доаѓа ќе е долга и ќе биде најтешка после Втора светска војна, како за нас така и за целиот свет и подобро да ја пребродиме заеднички отколку сами. Соработуваме тесно за да обезбедиме достапност на храна и договоривме прво меѓу себе да си помогнеме, доколку се соочиме со недостиг на домашните пазари, како последица од глобалната криза. Тука станува збор за основните прехранбени производи за кои нема да имаме забрани за тргување. Ќе овозможиме нивен стабилен и непречен проток, без никакво ограничување. Дури и да поставиме забрана за извоз, таа нема да важи за земјите од Отворен Балкан“, рече Ковачевски.
Владата како што рече веќе долго време работи на зголемување на домашното производство на храна, но во рамките на Отворен Балкан, и денес потпишаниот договор за соработка и воспоставувањето механизми за обезбедување на храна, земјите членки настапуваат како регион кој се грижи за своите граѓани и овозможуваат алтернатива во решавањето на егзистенцијални прашања во овие тешки времиња.
Ова е едно од неколкуте решенија меѓу добрите соседи, нагласи Ковачевски.
„Покрај нашите конкретни чекори за решавање на можниот недостаток на храна со кој потенцијално се среќава светот, ние денес се согласивме и за уште едно важно прашање, а тоа е соработката во енергетика и справувањето со енергетската криза. Ќе ги подобриме условите за меѓугранична трговија со електрична енергија и соработка помеѓу српската берза на електрична енергија и македонскиот оператор на организиран пазар на електрична енергија“, рече Ковачевски.
Премиерот објави и дека само изминатава седмица Владата префрлила 50 милиони евра на ЕСМ со цел да ја субвенционира цената на електричната енергија за домаќинствата и малите потрошувачи во износ од 80 проценти.
Тој додаде дека Македонија ги ангажира сите капацитети за производство на енергија за домашното производство да покрие 100 отсто од регулираниот пазар.
„Консолидацијата на електро системите на било која држава е невозможно доколку секоја држава го прави поединечно. Но, доколку заеднички работиме на нови производствени капацитети на електрична енергија, особено на базна енергија и особено на енергија од обновливи извори ќе направиме многу повеќе заедно за државите и за сите граѓани во нив“, посочи премиерот.
Во однос на заедничкиот одговор на природни катастрофи, тој рече дека регионот има договор за соработката, но нагласи дека сега се олеснуваат процедурите и се скратува времето потребно за распоредување помош, а се интензивира соработката и во намалувањето на ризиците од катастрофи. (С.К.)