Строгите мерки што беа воведени од самиот почеток на епидемијата, очигледно вродија со плод во борбата против коронавирусот. Грција е меѓу земјите со најниска стапка на смртност од ковид-19 во Европа.
Грчкиот премиер, Кирјакос Мицотакис, денеска порача дека од 4 мај во земјата постепено ќе започне ублажување на рестриктивните мерки, така што ќе почнат со работа помалите трговски продавници, фризерските и козметичките салони.
„Бидејќи мина првиот бран од вирусот, сега сме подготвени да преминеме на втората фаза, а тоа е постепено ублажување на рестриктивните мерки“, изјави Мицотакис во телевизиско обраќање.
Грчкиот премиер рече дека на 4 мај ќе бидат укинати рестрикциите за движење на граѓаните, а одделни продавници и јавни служби повторно ќе бидат отворени. Тој додаде дека движењето на граѓаните ќе биде ограничено на зоната во која живеат.
„Но, водете сметка, тоа не е крај на една лоша авантура, туку нејзино продолжување. Ќе излеземе од домовите, но остануваме одговорни“, рече Мицотакис, повторувајќи оти приоритет останува здравјето на граѓаните.
Мицотакис додаде дека ќе биде задолжително носење на заштитна маска во јавен превоз, во болниците и во фризерските салони. Физички активности ќе бидат дозволени од 11 мај на отворено и на море, но оти приватните плажи и натаму ќе останат затворени.
Одредени училишта ќе бидат отворени од 11 мај, додека од 17 мај верниците ќе можат да присуствуваат на литургии во црквите. Рестораните и хотелите ќе ги продолжат своите активности од 1 јуни. Во Грција беше воведен карантин од 23 март.
Досега во земјата од ковид-19 се заболени 2.534 лица, 136 починаа, а излечени се 577 лица. Грција во меѓувреме ја има една од најниските стапки на смртност од ковид-19 на 100.000 население.