Од март лани до април оваа година, околу 1,5 милиони деца ширум светот загубиле барем еден родител или старател поради пандемијата на ковид-19, покажува најновото истражување на тимот од „Империјал колеџ“ во Лондон, предводени од Сет Флаксман, кои до оваа бројка дојдоа создавајќи математички модел со помош на податоци за наталитетот и морталитетот од коронавирусот.
Со оглед на фактот дека овие податоците не се целосни за сите места, бројката може да биде само проценка, а веројатноста е поголема, напишаа научниците.
Бројот на деца кои изгубиле еден или двајцата родители поради пандемијата е особено голем во Јужна Африка, во Мексико, во Бразил и во Колумбија.
Вкупниот број на деца кои ги загубиле своите татковци е пет пати поголем од бројот на децата кои ги изгубиле своите мајки. Истражувањето на лондонски „Империјал колеџ“ е објавено во медицинското списание „Лансет“.