Лесното пренесување на новата варијанта на ковид-19 наречена омикрон, како во светот, така и кај нас, продонесе за драстично зголемување на бројот на новозаразени. Според последните податоци, во земјава се активни 19.104 случаи. Од почетокот на пандемијата досега се направени вкупно 1.727.856 милиони тестирања, дијагностицирани се 250.876 заболени, оздравеа 223.606 пациенти, а починаа 8.166 лица.
Министерот за здравство, Беким Сали, околу најавите за промени во Комисијата за заразни болести, нагласи дека тие ќе бидат во насока на проширување и дополнување на нејзиниот состав со нови професионални кадри од повеќе области, посочувајќи дека во тек се дискусии за тоа прашање.
Професионалното работење на Комисијата за заразни болести, посочи министерот, е од најголема важност, а одговорот кон потребите на граѓаните врвен приоритет.
Апсолутно го разбирам интересот на јавноста за натамошните чекори поврзани со составот на ова тело, бидејќи околностите бараат засилено и координирано дејствување врз основа на стручни и реалистични проценки. Во оваа Комисија веќе има доста искусни професионалци во своите области, а натамошните чекори ќе подразбираат надградба, усовршување и професионализација. Целта на овие мерки е секако намалување на бројот на заразени лица, како и воопшто заштита на јавното здравје, во најдобар интерес на граѓаните, додаде министерот Сали.
Над три милиони случаи на заразени со коронавирус во просек дневно, пак, се пријавувани во светот помеѓу 13 и 19 јануари што е петпати повеќе отколку на крајот на ноември кога се појави сојот Омикрон.
Во изминатите седум дена во просек биле пријавени 3.095.971 милиони случаи на ден, што е зголемување за 17 отсто во однос на претходната недела.