Mинистерот за надворешни работи на Грција во интервју за грчкиот весник „Документо“ вели дека е умерен оптимист во однос на решението на спорот за името и дека на двете страни се уште им претстои многу работа.
Тој ги пренесува веќе познатите ставоти за промена на Уставот, за името да биде и за внатрешна и за меѓународна употреба и за да се избегнат идни обвинувања дека биле прекршени уставните одредби, вели
– Промената на Уставот на пријателот и сосед, значи, прво имплементација на ерга омнес, односно употреба на новото име во сите случаи, на меѓународно и внатрешно ниво, како и за избегнување на идни несогласувања што би произлегле без оваа промена. Второ, дека во иднина би се избегнало една друга влада кај соседот да побара објаснувања за прекршување на Уставот, ако Меѓународниот договор излегува од надлежностите, вели шефот на грчката дипломатија, пренесува МИА.
Според Коѕијас, решението не треба да биде „едниот да му го наметне неговото мислење на другиот“, туку во пакет договор што ќе ги содржи неопходните заемни компромиси: елиминирање на иредентизмот и предвидување мерки и услови за да нема одново појавување, поддршка за интеграција на соседната земја во меѓународните организации и заеднички активности.
На прашањето дали еден Меѓународен договор би бил доволен за да се избегнат уставни промени кај нас, Коѕијас се повикува на досегашното искуство со одлуките на националните судови на земјите членки на Европската унија.
– Врз основа на член 27 од Виенската конвенција за договори, содржината преовладува над националното законодавство. Но, овој принцип се почесто не се спроведува. Ги знаеме одлуките на националните уставни судови на земјите – членки на ЕУ во врска со подреденоста или не на националното законодавство кон европското, за прашања поврзани со тврдото јадро на Уставот, а името е едно од тие. Според нив, Уставот го надминува секој Меѓународен договор, објаснува Коѕијас, пренесе МИА.
Косијас вели дека за се ова да се спроведе, потребно е време.
– Се уште имаме многу работа. Но, можностите да се најде решение се поголеми отколку во претходните години. Сакам да бидам умерено оптимист. Ги знам потешкотиите и знам низ колку пресврти поминуваат преговорите. Не е потребен прекумерен ентузијазам кога се изгледа лесно, ниту разочарување кога произлегуваат потешкотии. На сите оние што работат во дипломатијата, работата им е ентузијазмот да го направиме позитивна енергија за да се соочиме со потешкотиите и да ги надминеме, вели Коѕијас во интервју за “Документо“.