За време на новогодишната еуфорија и празниците во почетокот на првиот месец од годината, на територија на град Скопје извршени се речиси 150 тешки кражби и 17 тешки кражби во обид, информира СВР Скопје на барање на НОВА.
Секоја година, периодот од крајот на декември до првите денови во јануари, праксата покажува дека им е „најомилен“ на крадците.
Од 30.12.2017 до 08.01.2018 година, на територијата на главниот град извршени се вкупно 148 тешки кражби и 17 тешки кражби во обид, најмногу на подрачјето на општина Центар, потоа на општина Карпош, а и на територија на општините Аеродром и Гази Баба.
Истрагите покажале дека тешки кражби во станови најчесто се вршеле во временскиот период од 8 наутро до 16 часот, со прекачување на крадците преку балкон и насилно отворање на балконската врата, со насилно отварање или употреба на клуч (калауз) преку влезна врата и со кршење на цилиндар. Најмногу се одземал накит, пари, техничка стока и други предмети.
Во куќи пак, најчесто кражбите се вршеле во временскиот период од 16 часот до полноќ, со насилно отворање на балконски или влезни врати, со употреба на клуч-калауз и со кршење на цилиндер при што се одземале исто така накит, пари, техничка стока и други предмети.
Во викендиците, кражбите најчесто се вршеле во временскиот период од 8 наутро до 16 часот, со насилно отворање на прозорци или влезни врати, со кршење на катанец и на други начини, при што се одземале алати, прехранбени продукти, бела техника и други предмети за домаќинство.
Возилата најчесто биле ограбувани на паркинзи, претежно со употреба на физичка сила или погоден предмет.
Како што опишува МВР, најчесто се крши прозорецот од возилото или некоја од вратите, а најчесто се краделе преносни компјутери, патни торби и други предмети кои сопствениците ги оставаат на видни места во возилата.
До редакцијата на НОВА пристигна реакција на читател кој вели, не знае во кого да се сомнева бидејќи немал проблем со никого, така што, заклучува тој, крадците не бираат кого да ограбат.
„Во понеделникот без излезен на некое време надвор од станот во кој живеам. Не сум ни помислил дека кога ќе се вратам дома, ќе затекнам хаос од претурани фиоки, расфрлан мебел и слично. Украден ми е лап топот и накит кој го чував од мајка ми“, вели читателот за НОВА, кој пријавил во полиција откако увидел дека бил ограбен.
Во периодот од 30.декември до 8.јануари 38 тешки кражби имало во Центар како и девет кражби во обид. Во Карпош имало 26 тешки кражби и една кражба во обид а во Аеродром и Гази Баба по 17 тешки кражби.
Полесни кражби во истиот период, на територија на град Скопје имало дури 71.