Шпанецот Рафаел Надал ја збогати својата и онака богата колекција со нова гренслем титула. До 17-тата на турнирите од големата четворка, 11-та во Париз стигна по триумфот во финалето над Доминик Тим со 6:4, 6:3, 6:2 за што мина два часа и 44 минути на „Филип Шатрие, централен терен во комплексот на Ролан Гарос.
Одбраната на тронот на отвореното тениско првенство на Франција ја заокружи на импресивен начин во седумте меча во изминатите две недели. Единствен што успеа до сет против Надал беше Аргентинецот Диего Шварцман во четврт-финалето.
Покрај Тим и Шварцман, шпанскиот специјалист за игра на земјена подлога славеше и над Симоне Болели од Италија во првото коло, над Гвидо Пелја од Аргентина во второто, над Французинот Ришар Гаске во третото, над Максимилијан Мартерер од Германија во осминафиналето и над Хуан Мартин дел Потро во полуфиналето.
„Трета среќа“ за Халеп во Париз
Симона Халеп, пак, по двата неуспешни обида, конечно, дочека да се радува на гренслем успех во кариерата. Најзначајниот резултат, Романката го архивира во финалето против Слоун Стивенс од САД со 3:6, 6:4, 6:1. На патот до титулата забележа победи против Американките Алисон Риск и Тејлор Таунсенд во првото, односно, второто коло, против Германките Андреа Петковиќ и Анжелик Кербер во третата рунда, односно, четврт-финалето, против Белгијката Елис Мертенс во осминафиналето и против Шпанката Гарбиње Мугуруза во полуфиналето.
Ролан Гарос 2018/награден фонд – 39.197,000 милиони евра
Финале, мажи
Надал (1., Шпанија) – Тим (7., Австрија) 6:4, 6:3, 6:2
Финале, жени
Халеп (1., Романија) – Стивенс (10., САД) 3:6, 6:4, 6:1