Средновековната кула во италијанскиот град Болоња, која, како и нејзиниот познат пандан во Пиза, е навалена, затворена е за посетители поради опасност од уривање, објави денеска Би-Би-Си. Властите почнаа да градат ограда висока пет метри околу кулата Гарисенда од 12. век за да ги задржи остатоците во случај на уривање. Кулата висока 47 метри се наведнува под агол од четири степени, а мониторингот откри поместувања во насоката на навалувањето.
Градската управа соопшти дека ситуацијата е „многу загрижувачка“. Кулата Гарисенда е една од двете кули кои доминираат напанорамата на Болоња. Другата, кулата Асинели, е речиси двојно повисока и исто така се наведнува, иако не во иста мера, и е главно отворена за посетителите да се искачуваат.
Зградите биле изградени во период меѓу 1109 и 1119 година, а кулата Гарисенда била скратена во 14. век бидејќи веќе почнала да се навалува. Таа се споменува во поемата на Данте „Боженствената комедија“, завршена во 1321 година. Гарисенда веќе беше затворена во октомври откако сензорите открија промени во навалувањето на кулата, а инспекцијата утврди пропаѓање на материјалите во темелите.
Властите во Болоња започнаа т.н план за цивилна заштита за зачувување на кулата и нагласија дека овие работи „ја претставуваат првата фаза од обезбедувањето на кулата“. Тие додадоа дека оградата, освен што ќе ги задржи остатоците, ќе ги заштити и околните згради и луѓето во случај на уривање. Најавија и поставување метална мрежа против паѓање камења под кулата.
Изградбата на оградата ќе заврши на почетокот на следната година и се очекува кулата и околниот плоштад да останат затворени неколку години додека не се изврши реновирањето. Властите проценуваат дека оградата ќе чини 4,3 милиони евра и започнаа онлајн кампања за финансирање на реновирањето.
Тие го опишаа проектот како огромен предизвик кој ќе бара „посветеност на целиот град и оние ширум светот кои ја сакаат Болоња и еден од нејзините најважни симболи“.
Г. Т.