Кривичниот совет на Основниот суд Скопје 1 денеска ќе одлучува по барањата на ОЈО за организиран криминал и корупција за продолжување на притворите за осомничените за минатогодишните насилства во Собранието на 27 април, беше потврдено на денешниот брифинг на претседателот на Судот, Иван Џолев со новинарите.
Барањата на обвинителството се доставени до Кривичниот совет и се очекува до крајот на денешниот ден да бидат донесени и одлуки.
Обвинителството денеска соопшти дека бара продолжување на притворот на поранешниот министер за внатрешни работи Митко Чавков, Богдан Илиевски – Бетмен, актерот Владо Јовановски, режисерот Борис Дамовски, пратениците Крсто Мукоски, Љубен Арнаудов, Сашо Василевски и куќните притвори на Јохан Тарчуловски и Љупчо Димовски и на уште дваесетина осомничени.
Единствено за пратеничката Жаклина Пешевска се бара укинување на куќниот притвор, додека за поранешниот директор на Македонска опера и балет, Игор Дуловски и за Елена Доцевска-Божиновска, службеничка во Собранието, наместо притворот во истражниот затвор, се бара замена со куќен притвор.