Репертоарот на Кривичен суд и денеска останува актуелен за јавноста со нови продолженија во случите „Рекет“ и „Титаник“.
На последното рочиште за „Рекет“, јавноста беше исклучена од судницата во која се презентираа снимки од преостанатите три фолдери од УСБ-то на Зоран Милевски-Кичеец. За таквата одлука, судијката Васка Николовска-Масевска го искористи образложението на обвинителката дека „со јавното прикажување на разговорите ќе се наруши угледот на лица кои не се дел од овој кривично-правен настан“.
Случајот се наоѓа во доказна постапка, а застапник на обвинението е Вилма Русковска.
Основното јавно обвинителство за гонење организиран криминал и корупција во октомври минатата година поднесе обвинение против Бојан Јовановски, Катица Јанева и Зоран Милевски. Јовановски, како првообвинет, се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Јанева се товари дека сторила кривично дело „злоупотреба на службена положба и овластување“.

На првото рочиште за предметот што се одржа на 3 декември минатата година, третообвинетиот Зоран Милевски-Кичеец призна вина за делото „примање награда за противзаконито влијание“ и беше осуден на три години затвор.

Во Основниот кривичен суд во Скопје денеска треба да продолжи и судењето за предметот „Титаник“ што се води за изборни нерегуларности. Случајот е во доказна постапка со сослушување на сведоци по предлог на Обвинителството. Предметот го води судијата Осман Шабани, а застапник на обвинението е Лиле Стефанова.

Освен поранешниот премиер Никола Груевски, кој е во бегство, во „Титаник“ се обвинети и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.

Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање на изборна кампања. Случајот го отвори СЈО, за потоа да го преземе државното Јавно обвинителство, а случајот повторно беше распределен кај јавната обвинителка Лиле Стефанова.