Претседателот на Основниот суд Скопје, Владимир Панчевски, се пожали од односот на Специјалното јавно обвинителство, кое побара изземање на судијата на претходна постапка кој постапува по предметот „Трезор“.
„Претседателот на Основен суд Скопје 1 – Скопје во рок од три дена треба да одлучи по барањето за изземање на судијата, што е трето по ред барање за изземање на судии од страна на СЈО, што претставува преседан во постапување на јавно обвинителство бидејќи во досегашното работење на судот не било поднесено ниту едно вакво барање од страна на останатите обвинителства“, пишува во дописот од судот.
Според Панчевски, со ова СЈО дополнително влијаело на одолговлекување на постапките кои тие самите ги покренуваат до овој суд.
Во однос на предлогот за определување на мерка притвор за еден од осомничените во „Трезор“, по донесувањето на одлуката на судијата на претходна постапка, јавноста ќе биде дополнително информирана, соопштија од Кривичниот суд.
Претходно, обвинителството на Катица Јанева бараше изземање на судијката Лидија Петровска, кое беше одбиено од претседателот на судот Панчевски. Таа ќе го суди првиот случај на СЈО во кој кривично се гонат седуммина вработени во УБК на чело со поранешниот началник на Петтата управа на УБК, Горан Грујовски. Судијката Лидија Петровска, се споменува во опозициските бомби кои минатата година ги објави лидерот на СДСМ Зоран Заев.