Фер, кредибилни и коректно спроведени избори ќе бидат важен чекор за Македонија на својот пат кон ЕУ, порача денеска министерот за надворешни работи на Австрија, Себастијан Курц по средбата со македонскиот колега Никола Поповски.
– Долго време не верував дека ќе има термин за избори, но тоа успеа и ние во ЕУ сме среќни. Доколку овие избори бидат коректно спроведени тоа позитивно ќе влијае на Македонија кај земјите од ЕУ. Јасно е кога ќе утврдите критериуми, кога барате нешто од една држава, како реформи во правото или медиумите, тогаш е потребно да преземете чекори кога овие реформи ќе се случат, порача Курц, додавајќи дека е оптимист за европскиот пат на земјава бидејќи Извештајот на Европската комисија (ЕК) не покажувал само слабост туку и позитивен развој.
А токму годинашниов извештај во својот преглед ја опишува Македонија како земја во која се случила најголемата политичка криза од 2001 година наваму, во кој се вели дека државата била “заробена“.
„Што се однесува до политичките криетериуми, земјата се соочи со најголемата политичка криза од 2001 наваму. Демократијата и владеењето на правото постојано беа предизвикувани, особено поради заробеноста на државата, што ги погоди функционирањето на демократските институции и клучните области од општеството. Земјата страда од поделена политичка култура и недостаток за компромис“, се вели во Извештајот за напредокот.
…и потоа во делот на Владеење:
„Продолжија сериозните предизвици за демократско владеење, покренувајќи грижа за заробеноста на институциите и клучните фактори од општеството, од страна на државата. Телата за независност, контрола и надгледување не работеа активно и ефективно, без политичко влијание“, се вели во Извештајот притоа повикувајќи ја Владата да се држи до Договорот од Пржино и да спроведе сериозни реформи и да спроведе фер и кредибилни избори.
Одговарајќи токму на прашање на НОВА за овој епитет, Курц дипломатски одговори дека добро го познава Извештајот на ЕК и иако во поголем дел се согласува со него, на земјата треба да и се честита за некои добри работи, како што е справувањето со бегалската криза.
– Добро го знам Извештајот за напредокот на Македонија и различните пасуси. Некои се многу критични – со право, додека некои се исто позитивни – со право. Имаме интерес за добар развој на државата. Секако дека дел од тоа е да се водат реформи за зајакнување на правната држава и на медиумската слобода и секако еден дел од тоа е да имаме слободни и фер избори. Но и позитивно треба да се гледа улогата на Македонија во бегалската криза. Можам да кажам дека се согласувам со голем дел од употребените зборови, одговара австрискиот шеф на дипломатијата.
По синоќешните бурни реакции на социјалните мрежи за неговото присуство на митингот на ВМРО-ДПМНЕ во Скопје, Курц на барање на новинарите, рече дека бил во својство на претставник на својата партија.
– Овде сум како австриски министер за надворешни работи. Вчера бев на настан на партијата присутен како претставник на Народната партија на Австрија. За мене не е невообичаено да се посетуваат настани на сестрински политички партии. Во мојот говор не ги повикав луѓето за кого да гласаат. Ги повикав да излезат на избори, а одлуката треба тие да ја донесат, рече Курц.