Ниту најдоброто издание на фудбалската репрезентација на БиХ во квалификациите за ЕП 2020 не беше доволно за триумф против Италија во Торино. Избраниците на Роберт Просинечки одлични тргнаа на „Јуве арена“ и поведоа по прекрасната акција и погодокот на Един Џеко во 32. минута, но „азурите“ успеаја до пресврт во вториот дел за максимален учинок во циклусот по четири одиграни натпревари.
Лоренцо Инсиње ја искористи лошо поставената одбрана на „змаевите“ по корнерот на Бернардески во 49. минута и со прецизен волеј го матира Ибрахим Шехиќ за 1:1. Играчот на Наполи учествуваше како асистент за победоносниот гол за домашната селекција што го постигна Марко Верати во 86. минута.
Германија, пак, бесмилосно ја „распарчи“ Естонија со 8:0 во меч од групата Ц. По два гола на „Опел арена“ во Мајнц постигнаа Марко Ројс (10’ и 37’) и Серж Гнабри (17’ и 62’), по еден додадоа Леон Горецка (20’), Илкај Гундоган од пенал (26’), Тимо Вернер (79’) и Лирој Сане (88’).
Изненадување на вечерта приреди репрезентацијата на Ерменија која славеше над Грција, на стадионот „Спирос Луис“ во Атина, со 3:2. Меѓу стрелците за гостинскиот тим и екс вардарецот Тигран Барсегјан кој погоди во 74. минута, откако мрежата на Влаходимос ја тресеа и Александер Карапетјан во 8. минута и Геворг Газарјан во 33. минута. Зека во 54. минута и Константинос Фортунис во 87. минута беа стрелци на головите за Грција.
Квалификации за ЕП 2020
Група Ц
Германија – Естонија 8:0
Белорусија – Северна Ирска 0:1
Табела: Северна Ирска 12 бода (4 меча), Германија 9 (3), Холандија 3 (2), Белорусија 0 (4), Естонија 0 (3).
Група Е
Унгарија – Велс 1:0
Азербејџан – Словачка 1:5
Табела: Унгарија 9 бода (4 меча), Словачка 6 (3), Хрватска 6 (3), Велс 3 (3), Азербејџан 0 (3).
Група Х
Албанија – Молдавија 2:0
Исланд – Турција 2:1
Андора – Франција 0:4
Табела: Франција 9 бода (4 меча), Турција 9 (4), Исланд 9 (4), Албанија 6 (4), Молдавија 3 (4), Андора 0 (4).
Група И
Белгија – Шкотска 3:0
Русија – Кипар 1:0
Казахстан – Сан Марино 4:0
Табела: Белгија 12 бода (4 меча), Русија 9 (4), Казахстан 6 (4), Шкотска 6 (4), Кипар 3 (4), Сан Марино 0 (4).
Група Ј
Италија – БиХ 2:1
Грција – Ерменија 2:3
Лихтенштајн – Финска 0:2
Табела: Италија 12 бода (4 меча), Финска 9 (4), Ерменија 6 (4), Грција 4 (4), БиХ 4 (4), Лихтенштајн 0 (4).