Фудбалските репрезентации на Македонија и на Словенија, вечерва (20.45 ч.) на националната арена „Тоше Проески“ во шеста меѓусебна пресметка, втора за бодови и најзначајна досега. По трите победи на „црвено-жолтите“ (4:1, 2:0 и 3:2) и поразот во Копер (0:1) во пријателски мечеви и мартовското реми (1:1), на ред е реваншот во квалификациите за Европското првенство во 2020 година. Разликата меѓу двете селекции на табелата во групата Г е само три бода во корист на составот на Матјаж Кек, па затоа и силната мотивираност и желба за победа кај момците на Игор Ангеловски за внесување на дополнителна неизвесност за завршницата на циклусот.
„Ветувам дека ќе изгинеме на терен. Знаеме што носи овој меч и затоа мора да бидеме на ниво. Како што Словенија се надева дека може да заврши како втора во групата, така се надеваме и ние. Свесни сме за квалитет со кој располагаме и не гледам на кој ден од теренот се Словенците во предност“, вели капитенот Горан Пандев.
Селекторот Игор Ангеловски нема може да смета на тројца фудбалери од повиканите за вечерашниот дуел. Енис Барди и Крсте Велкоски отпаднаа поради повреди, Егзон Бејтулаи поради жолти картони. Меѓутоа, за разлика од офанзивниот играч на Леванте и напаѓачот на Сараево, дефанзивецот на Шкендија ќе биде во комбинација за неделното гостување против Полска во Варшава во осмото коло.
„Табелата не нè интересира, овие денови размислувавме само на Словенија и како да победиме. Имаме две отсуства што се проблем за нас меѓутоа подготвени сме за игра и за трите бода што сите ги посакуваме. На терен ќе излезат 11 гладни фудбалери борба во што не се сомневам и силно верувам во нив“, истакна Ангеловски.
По шест одиграни меча во групата Г, Полска е на челната позиција со 13 бода и вечерва (20.45 ч.) важи за апсолутен фаворит во натпреварот со Летонија во Рига. Во рамки на седмото коло, Австрија, во Виена од 20.45 ч., ја дочекува селекцијата на Израел.
Квалификации за ЕП 2020 во фудбал
Група Ц
Белорусија – Естонија (18 ч.)
Холандија – Северна Ирска (20.45 ч.)
Табела: Германија 12 бода, Северна Ирска 12, Холандија 9, Белорусија 3, Естонија 0.
Група Е
Словачка – Велс (20.45 ч.)
Хрватска – Унгарија (20.45 ч.)
Табела: Хрватска 10 бода, Словачка 9, Унгарија 9, Велс 6, Азербејџан 1.
Група Г
Македонија – Словенија (20.45 ч.)
Летонија – Полска (20.45 ч.)
Австрија – Израел (20.45 ч.)
Табела: Полска 13 бода, Словенија 11, Австрија 10, Македонија 8, Израел 8, Летонија 0.
Група И
Казахстан – Кипар (16 ч.)
Русија – Шкотска (20.45 ч.)
Белгија – Сан Марино (20.45 ч.)
Табела: Белгија 18 бода, Русија 15, Казахстан 7, Кипар 7, Шкотска 6, Сан Марино 0.