Македонската фудбалска репрезентација ќе се обиде да задржи купе во возот што по редовната рута на квалификации води до Европското првенство во 2020 година. Вечерашната станица е во Бер Шева и натпревар со селекцијата на Израел на стадионот „Тото Тарнер“ со почеток во 20.45 часот по што ќе продолжи кон Рига каде во недела ќе гостува и на Летонија во шестото коло во групата Г.
Исходите од двата меча ќе го детерминираат и значењето на преостанатите четири (по два во октомври и во ноември). Со евентуални три и повеќе освоени бода, „црвено-црните“ ќе останат конкурентни во борбата за второ место на табелата. Во спротивно, натпреварувачкиот дух ќе остане, но финишот на циклусот, објективно, ќе биде претворен во подготовки за полуфиналниот судир со Косово во Лигата на нации во која влогот, исто така, е ЕП 2020.
Селекторот Игор Ангеловски во пресрет на вечерашниот дуел со Израел се соочуваше со две непознати – настапот на Горан Пандев и на Аријан Адеми. И капитенот и столбот во играта на загрепски Динамо со статус на неизвесни. Пандев е со хематом во пределот на слабината, Адеми е со проблеми во зглобот на левата нога, па дали ќе бидат во почетниот тим или ќе почнат на клупа ќе лебди до пред самиот меч.
„Ќе се обидеме да бидеме тие што се прашуваат на терен и од нас да зависи текот на натпреварот“, е пораката на селекторот од Израел.
Македонија во дуелот со Израел влегува од претпоследното место во групата Г. „Црвено-жолтите“ досега собраа четири бода од четири меча во кои забележаа триумф над Летонија (3:1), реми со Словенија (1:1) и два пораза од Полска (0:1) и од Австрија (1:4). Петтото коло во конкуренцијата ќе биде комплетирано утревечер со мечевите Словенија – Полска и Австрија – Летонија.
Квалификации за ЕП 2020 во фудбал
Денеска играат
Група Д: Р. Ирска – Швајцарија (20.45 ч.), Гибралтар – Данска (20.45 ч.)
Група Ф: Романија – Шпанија (20.45 ч.), Норвешка – Малта (20.45 ч.), Фарски Острови – Шведска (20.45 ч.)
Група Г: Израел – С. Македонија (20.45 ч.)
Група Ј: Ерменија – Италија (18 ч.), БиХ – Лихтенштајн (20.45 ч.), Финска – Грција (2о.45 ч.)