Македонија во минатото ремизираше против Данска (1:1) како актуелен европски шампион од ЕП 1992, против Холандија (2:2 и 0:0), против Англија (2:2 и 0:0), против Белгија (1:1), ја совлада Република Ирска (3:2), но вечерашниот бод што го освои е највредниот од аспект на реномето на ривалот што го имаше наспроти себе. Фудбалската репрезентација одигра 1:1 против четирикратниот светски првак Италија за изненадување на вечерта во претпоследното коло од квалификациите за СП 2018. Кјелини во 40 минута обезбеди водство за „азурите“, Трајковски во 77. го поништи и дефинитивно го исфрли составот на Џан Пјеро Вентура од трка за првото место во групата Г.
„Црвено-жолтите“ имаа одлично гостување на „Олимпико“ во Торино по кое остануваат на само еден пораз во 2017 година (од Шпанија во Скопје 1:2). Во позитивниот биланс за изминатите девет месеци се вкалкулирани три победи (Лихтенштајн 3:0, Белорусија 3:0, Израел 1:0) и три нерешени исходи (Турција 0:0, Албанија 1:1, Италија 1:1) за потврда за новите ветришта во националниот тим и влијанието на свежата крв од младата селекција.
https://www.youtube.com/watch?v=l8EbEnTWg_8
Пандев еднаш, Инсиње во два наврата и Запакоста се обидоа да погодат во Торино пред да успее во тоа Кјелини во 40 минута од првото полувреме по асистенција на Чиро Имобиле. Желбата и дрскоста за игра и надигрување ги задржаа македонските фудбалери во продолжението. Нивна креација беа единствените ситуации вредни за одбележување во продолжение на средбата. Најпрво Илија Несторовски ја тестирае будноста на Џанлуиџи Буфон по нафрлување на Алиоски за резервистот Трајковски (влезе на местото на Ферхан Хасани во 64 минута) да го претвори во гол додавањето од Горан Пандев за израмнување што остана актуелно и по последниот свиреж на португалскиот арбитар Тиаго Мартинс.
За напаѓачот на Палермо ова е јубилеен десети гол во репрезентативниот дрес во 37 настап и се надоврза на Несторовски и на Хасани како стрелци против Италија во тековниот мундијалски циклус. Во останатите два вечерашни меча во Г конкуренцијата Шпанија ја совлада Албанија со 3:0, а Израел славеше над Лихтенштајн во Вадуц со 1:0.
Македонија ги завршува квалификациите со натпревар на домашен терен против Лихтенштајн. Пресметката со фенерџијата во групата Г е во понеделник на стадионот „Младост“ во Струмица со почеток во 20,45 часот.
Италија – Македонија 1:1 (1:0)
Стадион: „Олимпико“ во Торино. Гледачи: 25.000. Гл. судија: Тиаго Мартинс. Асистенти: Рикардо Сантош и Луис Кампош (сите тројца од Португалија). Ж. картони: Пароло (Италија); Хасани, Спировски (Македонија). Стрелци: Кјелини 40′ за Италија, Трајковски 77′ за Македонија.
Италија: Буфон, Кјелини, Бонучи, Барзалји (Ругани 46′), Дармијан, Галјардини (Кристанте 75′), Пароло, Запакоста, Инсиње, Верди (Бернардески 64′), Имобиле. Селектор: Џан Пјеро Вентура.
Македонија: Димитриевски, Ристовски, Муслиу, Велковски (Зајков 75′), Алиоски, Спировски, Барди, Радески, Хасани (Трајковски 64′), Пандев (Тричковски 80′), Несторовски. Селектор: Игор Ангеловски.
Квалификации за СП 2018
Група Д
Австрија – Србија 3:2
Република Ирска – Молдавија 2:0
Грузија – Велс 0:1
Табела: Србија 18, Велс 17, Република Ирска 16, Австрија 12, Грузија 5, Молдавија 1.
Идно коло (9 октомври): Србија – Грузија, Велс – Република Ирска, Молдавија – Австрија
Група Г
Италија – Македонија 1:1
Шпанија – Албанија 3:0
Лихтенштан – Израел 0:1
Табела: Шпанија 25, Италија 20, Албанија 13, Израел 12, Македонија 8, Лихтенштајн 0.
Идно коло (9 октомври): Македонија – Лихтенштајн, Израел – Шпанија, Албанија – Италија
Група И
Хрватска – Финска 1:1
Турција – Исланд 0:3
Косово – Украина 0:2
Табела: Исланд 19, Хрватска 17, Украина 17, Турција 14, Финска 8, Косово 1.
Идно коло (9 октомври): Исланд – Косово, Украина – Хрватска, Финска – Турција.
Табела на второпласираните селекции
Португалија 15 (шест меча)
Италија 14 (7)
Данска 13 (7)
Северна Ирска 13 (7)
Велс 11 (7)
Хрватска 11 (7)
Шкотска 11 (7)
Шведска 10 (6)
БиХ 8 (6)