Ждрепката за квалификациите за Вимблдон не беше наклонета на Лина Ѓорческа. Најдобрата македонска тенисерка уште на стартот ќе се соочи со првата носителка, Александра Круниќ. Србинката е моментно на 99 место на ВТА ранг листата, Ѓорческа е 180 рекет кај дамите во светот.

Неофицијалното светско тениско првенство е единствениот гренслем на кој Ѓорческа досега немаше настап. Со квалификации за турнирите од големата четворка почна лани во септември. Дебито на Ју-Ес опен го заврши во првото коло по поразот од Катрин Белис со 0:6, 2:6.

Во Мелбурн, пак, беше на чекор до главниот турнир. Во првото коло за Австралија опен ја елиминира Американката Салија Викери (6:2, 3:6, 6:3), во второто беше подобра и од Унгарката Далма Галфи (6:1, 6:1) пред да загуби од првата носителка, Швајцарката Стефани Фогел (6:4, 3:6, 2:6).

Ѓорческа на Ролан Гарос мина како и на Ју-Ес опен. Холанѓанката Квирин Лемон беше подобра со 6:3, 3:6, 3:6 во првото коло.

Дуелот меѓу Ѓорческа и Круниќ е најавен за утре попладне.