Грците му се налутија на новиот претседател на Европскиот парламент (ЕП) Италијанот Антонио Тајани. Неговиот грев е што пред една година, поточно на 26 февруари 2016 година, Тајани го изговорил зборот Македонија зборувајќи за нашата земја и поврзувајќи ја со Александар Велики.
“Македонија е убава земја. Сите во Италија ја знаат Македонија. Зошто? Затоа што Александар Македонски и Филип Македонски се ваши познати претци”, рекол Тајани додека престојувал во Скопје на покана на ВМРО-ДПМНЕ.
“Без Александар Македонски немаше да имаме Европа бидејќи тој е првиот крал кој ја сопрел окупацијата од Иран и тие земји. Затоа го викаат Александар Велики. Тој ги зајакна европските граници”, додал Тајани.
Оваа изјава е проследена со силен аплауз од присутната публика во Скопје.
Европскиот портал Еурактив денес јавува дека Грците дури сега го виделе видеото во кое cе содржани овие зборови а тоа било емитуванo на грчката ТВ Ант1.
Речиси сите грчки партии реагирале на ова видео вклучително и Нова демократија која е членка на Европската народна партија на која и припаѓа Тајани.
На ова Италијанот објави соопштение во кое се вели дека европските институции земјата ја признаваат како “поранешна југословенска Република Македонија”.
“Во врска со медиумските извештаи за посетата на г-дин Тајани во Скопје, новиот претседател потврдува дека воспоставениот став на ЕП е дека оваа институција ја признава земјата меѓународно признаена како поранешна југословенска Република Македонија (ПЈРМ), вели соопштението од кабинетот на Тајани.
За пратеникот од Сириза Костас Крисогонос, Тајани докажал дека “не само што не ја познава историјата туку е и лекомислен”.
Елиза Воземберг од Нова демократија вели дека италијанскиот политичар “појма нема од географија” а Никој Андрулакис од Пасок изјавил: “Замислете мајката на Тајани да не беше професор по старогрчки. Што ли тогаш ќе кажеше?”.