Украина пристигна во Скопје со драстично изменет состав за разликата од минатите години. Првиот противник на Македонија во квалификациите за ЕП 2018 е без неколку стандардни ракометари, дел од нив поради повреди, дел се повлекоа од репрезентативните настапи. Но, тоа не смее да ги опушти и залаже избраниците на Лино Червар дека ќе биде лесно утре (18.30 ч.) во ВИП арена „Борис Трајковски“ бидејќи основата е составена од играчи на Мотор, потоа Запорожје, Татран Прешов.
Подмладување и „пензионирање“, во меѓувреме, беше присутно и во македонскиот национален тим. Ги нема Мојсовски и Миркуловски, во А тимот се вклучени играчи кои допрва ќе треба да се докажуваат и наметнуваат, да понесуваат одговорност, да учат од преостанатите „староседелци“, пред се, како Кире Лазаров кој ќе биде предводник кон Хрватска низ шесте дуели во групата. Утрешниот дуел меѓу Македонија и Украина ќе биде и прв меѓусебен.
„Против Украина почнуваме еден нов циклус на квалификации во кои наша основна цел е пласман на европското првенство. По избореното учество на мундијалот во Франција, сакаме да бидеме дел и од завршницата во Хрватска. Имавме прилика да погледнеме натпревар на Украинците и заклучок е дека играат типична руска школа на ракомет. Можеби им фалат некои ракометари, но никако не смееме да ги потцениме. И покрај тоа што и ние сме во малку изменет состав, силно веруваме дека утре можеме да го направиме посакуваниот првиот исчекор кон европското првенство што ќе биде од големо значење за дуелите што следуваат“, смета капитенот Кире Лазаров.