Порто и Севилја се последните екипи што се пробија во осминафиналето во Лигата на шампиони по дуелите од шестото, последно, коло во групната фаза. Португалскиот состав на „Драгао“ го торпедира Лестер со 5:0 за прв пораз на англискиот првак во дебитантското учество во клупската фудбалска елита на стариот континент. Копенхаген во вториот меч во групата Г го совлада Бриж со 2:0 и напролет ќе продолжи во нокаут фазата во Лига Европа. Белгискиот состав заврши на последното место без бодови како и Динамо Загреб во групата Х.
Севилја, пак, одигра 0:0 на „Лион парк“ против Олимпик што беше доволно за составот од шпанската покраина Андалузија да биде сопатник на Јувентус во топ 16 фазата од групата Х. Јувентус во Торино триумфира против Динамо Загреб со 2:0.
Дербито на вечерта заврши без победник. Борусија Дортмунд ремизира (2:2) на „Сантијаго Бернабеу“ и во ждрепката за осминафинале се најави како првопласирана од групата Ф. „Кралскиот“ клуб водеше со 2:0 со головите на Карим Бензема во 28 минута и во 53 минута, „милионерите“ избегнаа пораз благодарение на Обамејанг во 60 минута и на Марко Ројс во 88 минута. Легија во Варшава го совлада Спортинг со 1:о и го освои третото место во конкуренцијата што значи европска пролет за полскиот клуб.
Тотенхем, пак, ја порази ЦСКА Москва со 3:1 за трета позиција во групата Е и учество во Лига Европа. Баер Леверкузен подобар од Монако со 3:0 во меч без никакво значење за конечниот изглед на табелата со оглед дека на коло до крајот француската екипа го осигура првото место, а германската второто.
Ждрепката за осминафиналните двоки е закажана за понеделник.
Лига на шампиони
Резултати, 6. коло
Група Е: Тотенхем – ЦСКА Москва 3:1, Баер Леверкузен – Монако 3:0. Табела: Монако 11, Баер Леверккузен 10, Тотенхем 7, ЦСКА Москва 3.
Група Ф: Реал Мадрид – Борусија Дортмунд 2:2, Легија Варшава – Спортинг Лисабон 1:0. Табела: Борусија Дортмунд 14, Реал Мадрид 12, Легија Варшава 4, Спортинг Лисабон 3.
Група Г: Порто – Лестер 5:0, Бриж – Копенхаген 0:2. Табела: Лестер 13, Порто 11, Копенхаген 9, Бриж 0.
Група Х: Јувентус – Динамо Загреб 2:0, Олимпик Лион – Севила 0:0. Табела: Јувентус 14, Севилја 11, Олимпик Лион 8, Динамо Загреб 0.