Левица бара формирање на експертска влада и порачува дека и се “преку глава нивните сплетки, интриги и стремежот да бидат на власт по секоја цена”, вели партијата зборувајќи за партиите од власта но и за СДСМ.
Според оваа партија “во поднесувањето оставки во Владата на РМ од страна на ДУИ, Левица гледа шанса процесот на враќање на демократијата во Македонија конечно да биде поставен на здрави основи”.
За да се постават здравите основи, според Левица “потребно е сите министри да поднесат оставки, целата влада да се повлече и да биде избрана нова експертска влада, составена од личности колку што е можно понезависни од политичките партии. И со мандат да ги создаде сите услови за организирање фер и демократски избори”.
“Старите партии се способни само за креирање кризи. Затоа, потребно е да се формира експертска влада.
Сведоци сме на најновиот чин од политичката фарса во Македонија со поднесувањето оставки во Владата на РМ од страна на ДУИ. Можеби не е случајно што тоа се случи неколку часа пред 1 април, зашто веќе подолго време целата ситуација е гротескна, вели партијата преку соопштение.
Во соопштението Левица го изразува своето несогласување со ставот на СДСМ околу оставките на ДУИ:
“Сегашната влада, дополнително делегитимирана со оставките на ДУИ, е техничка влада само во имагинацијата на СДСМ, која така ја нарекува само за да ги прикрие огромните отстапки што ги направи во Пржинскиот договор. Граѓаните што протестираа во мај минатата година бараа експертска влада”, вели Левица.
Левица: Старите партии мора да разберат дека земјата не се врти околу нив. Недозволиво е нивното држење во заложништво на сите граѓани во Македонија.
И Левица во оваа прилика се залага и за “решавање на реалните проблеми на граѓаните”.
“Во меѓувреме, додека на политичарите приоритет им е доаѓањето на власт за да остваруваат тесни лични интереси, секојдневните маки со кои се соочува народот, продолжуваат. Вчера, 30-тина работнички во фабриката „Веибо Груп“ во Крива Паланка добија отказ и останаа на улица. Старите партии мора да разберат дека земјата не се врти околу нив. Недозволиво е нивното држење во заложништво на сите граѓани во Македонија. Преку глава ни се нивните сплетки, интриги и стремежот да бидат на власт по секоја цена”, остро порачува Левица.