Лидерите на земјава по повод Рамазанските пости упатија честитки преку медиумите до сите граѓани од исламска вероисповед.
Претседателот Ѓорге Иванов упати честитка до поглаварот на Исламската верска заедница во Република Македонија, Реис-ул-улема Хаџи Сулејман ефенди Реџепи, до членовите на Ријасетот и до сите припадници на исламската вероисповед во Република Македонија.
„Дозволете ми Вам, лично, и на членовите на Ријасетот, муфтиите, имамите и на сите граѓани од исламска вероисповед во Република Македонија да Ви упатам честитки по повод почетокот на рамазанските пости“, вели Иванов во честитката.
Тој потенцира дека солидарноста и милосрдието се заеднички вредности на кои нè учат религиите, но, добрината, милоста и споделувањето се човечки доблести кон кои треба да се стремиме.
Собранискиот спикер Талат Џафери во својата честитка и од име на пратениците до поглаварот на ИВЗ вели:
„Светиот месец Рамазан е месец посветен на солидарност, сплотеност и хуманост, месец кој ги буди во нас меѓусебното разбирање, почитта, несебичноста и човекољубието. Преку постот тежнееме кон постигнување на духовно и телесно прочистување и со тоа придонесуваме кон градење на поздраво општество и посветла иднина за нашите деца.Овој свет месец Рамазан нека биде исполнет со среќа во нашите домови, мир во нашите души и добрина во срцетто“.
Мандатарот Зоран Заев, во чест на почетокот на Рамазанските пости во свое име и во име на СДСМ исто така упати честитка до поглаварот на ИВЗ како и до сите граѓани кои го чествуваат големиот празник Рамазан Бајрам.
„Го честитам почетокот на овогодинешните Рамазански пости на сите граѓани кои го чествуваат празникот Рамазан Бајрам. Посакувам Светиот месец Рамазан да донесе личен духовен мир и семејна хармонија.
Заев потенцира дека е неопходно меѓусебно почитување и разбирање и зацврстување на определбата за вистина, правда и солидарност како важни темели на нашето заедничко општество.
Посакувајќи им духовен мир, и техничкиот премиер Емил Димитриев упати порака до граѓаните од исламска вероисповед и првиот човек на ИВЗ, за вербата да помогне да продолжиме со градење на општество кое се карактеризира со меѓусебно почитување, соработка и заемна толеранција.
– Да работиме и понатаму за реализација на активностите кои обезбедуваат интерес за сите граѓани на нашата земја, решавање на секојдневните проблеми со кои се соочува населението, подобрување на стандардот, и развој на Република Македонија, вели Димитриев во својата честитка.