Краснодар, Манчестер јунајтед и Шалке 04 се првите три екипи што се пробија до осминафинале во Лига Европа.
Фенербахче не успеа да ја искористи предноста на домашниот терен за анулирање на негативата од Русија по првата средба (0:1). Краснодар поведе во Истанул уште во седмата минута со голот на Федор Смолов на што турскиот гигант одговори во 41 минута преку Соуса. Резултатот од полувреме остана актуелен до крајот за елиминацијата на тимот на Дик Адвокат.
Победник немаше ниту во Гелзенкирхен каде Шалке 04 и ПАОК одиграа 1:1. Шоп во 23 минута погоди за домашните, автоголот на Матија Настасиќ во 25 минута беше единствениот за грчкиот ривал. Натаму продолжува бундеслигашот благодарение на убедливата победа со 3:0 во Солун.
Манчестер јунајтед рутински го одработи Сент Етјен во шеснаесетфиналето. По триумфот на „Олд трафорд“ со 3:0, „црвените ѓаволи“ славеа и попладнево во Франција со 1:0. Стрелец на единствениот гол беше Хенрик Мктарјан во 17 минута. Екипата на Жозе Мурињо ги одигра последните 30 минути со фудбалер помалку по исклучувањето на Ерик Бејли. Младиот стопер доби два жолти картона во 60 минута и во 63 минута.
Лига Европа
1/16 финале, реванши
Фенербахче – Краснодар 1:1 (прв меч – 0:1)
Сент Етјен – Манчестер јунајтед 0:1 (0:3)
Шалке 04 – ПАОК 1:1 (3:0)