Фудбалерите на Вардар со единствен императив ќе истрчаат вечерва на „Аноета“ во Сан Себастијан на реваншот со Реал Сосиедад во рамки на четвртото коло во групната фаза во УЕФА Европа лигата. Нивна желба е поправање на играчкиот впечаток од првиот меч, а ако тоа биде доволно и за поволен резултат од оние 0:6 на 19 октомври на „Телеком арена“ во Скопје. Свесни се дека ќе биде ѓаволски тешко, но истовремено изразуваат верба дека лекцијата е научена и дека, овојпат, ќе се обидат да бидат достоен партнер на фаворизираниот шпански претставник.
„За Реал Сосиедад не треба да се трошат зборови. Знаеме со каков противник имаме работа. Треба да гледаме како ние ќе одиграме. Ќе дадеме максимум од нас за надигрување и со намера да ја поправиме лошата слика од првиот натпревар. Во Скопје им овозожиме многу простор по страничните позиции по кои се најсилни. Со наша добра организација и со нивно затворање се надевам дека ќе можеме до поволен резултат“, истакна вардаровиот предводник, Чедомир Јаневски.
Гостувањето на „црвено-црните“ кај Реал Сосиедад доаѓа во незгоден момент. Македонскиот првак се наоѓа во резултатска криза во домашното првенство, а запиша и три убедливи порази и во Лига Европа, реалност од која не бега и Хуан Фелипе.
„Среде тежок период сме и во мала резултатска криза, но ќе се обидеме да изненадиме. Едноставно мора да дадеме максимум. Предизвикот е голем, противникот е квалитетен, а за поволен резултат секој од нас ќе мора да го извлече најдоброто од себе“, коментира Бразилецот кој е стрелец и на, засега, единствениот гол за вардарци во групата Л во ЛЕ.
Во вториот меч во групата, Розенборг го дочекува лидерот на табелата, Зенит од Санкт Петербург.
Лига Европа – 4 коло
Вечерва играат
АЕК – Милан (19 ч.)
Аполон – Аталанта
Истанбул Басакшехир – Хофенхајм
Копенхаген – Злин
Локомотив Москва – Шериф Тираспол
Лудогорец – Брага
Олимпик Лион – Евертон
Макаби Тел Авив – Астана
Партизан – Скендербег
Риека – Австрија Виена
Славија Прага – Вилјареал
Јанг Бојс – Динамо Киев
Арсенал – Црвена звезда (21,05 ч.)
Атлетик Билбао – Естерсундс
Келн – БАТЕ Борисов
ФЦС Букурешт – Хапоел Бер Шева
Виторија Гимараеш – Олимпик Марсеј
Херта – Зорја Луханск
Лацио – Ница
Викторија Плзен – Лугано
Реал Сосиедад – Вардар
Розенборг – Зенит Санкт Петербург
Салцбург – Конјаспор
Витесе – Зулте Варегем