Интер ја оптимизира сопствената судбина и ја искомпликува на Борусија Дортмунд по три одиграни кола во групата Ф во Лигата на шампиони на УЕФА. „Нероазурите“ го совладаа бундеслигашот на „Џузепе Меаца“ со 2:0 и се пробија до второто место на табелата, веднаш зад лидерот Барселона.
Лаутаро Мартинез во 22. минута и Антонио Кандрева во 89. минута погодија за „сино-црните“ од Милано кои сега имаат идентичен број на бодови со „милионерите“ пред реваншот на 5 ноември на „Вестфален“.
Барселона, потешко од очекувањата, мина на гостувањето во Прага кај Славија. Каталонците ги понесоа трите бода по победата од 2:1 за што најголема заслуга има Луис Суарез. Тимот на Ернесто Валверде поведе уште во третата минута со голот на Лионел Меси. Домашните израмнија во 50. минута преку Јан Борил, а вториот триумф на шпанскиот претставник во ЛШ во оваа сезона го потврди Петер Олајинка со автоголот во 57. минута, момент за кој пресуди снаодливоста на уругвајскиот напаѓач кај гостите.
Со три бода од гости се враќа и Наполи. Калчолигашот триумфира кај Салцбург со 3:2 и остана лидер во групата Е. Двоен стрелец за наполитанците беше Дрис Мертенс во 17. и во 64. минута, печат на победата стави Лоренцо Инсиње во 73. минута. Двете реализации за австрискиот состав беа дело на Халанд во 40. минута од пенал и во 72. минута по додавање на Јунузовиќ.
Македонскиот репрезентативец, Елиф Елмас ги одигра последните 10 минути на средбата на „Ред Бул“ арена.
Убедлив триумф на гости и на европскиот првак, Ливерпул. „Црвените“ во Белгија го поразија Генк со 4:1 со дват гола на Окслејд Чемпбрлејн во втората и во 57. минута и по еден на Садио Мане во 77. минута и Мохамед Салах во 87. минута. Почесниот за домашните го постигна Нигериецот Стивен Одеј во 88. минута.
Лига на шампиони
Група Е
Генк – Ливерпул 1:4
Салцбург – Наполи 2:3
Табела: Наполи 7, Ливерпул 6, Салцбург 3, Генк 1.
Идно коло (5.11.2019 год.): Ливерпул – Генк, Наполи – Салцбург
Група Ф
Интер – Борусија Дортмунд 2:0
Славија Прага – Барселона 1:2
Табела: Барселона 7, Интер 4, Борусија Дортмунд 4, Славија Прага 1.
Идно коло (5.11.2019 год.): Борусија Дортмунд – Интер, Барселона – Славија Прага
Група Г
Бенфика – Олимпик Лион 2:1
Лајпциг – Зенит Санкт Петербург 2:1
Табела: Лајпциг 6, Зенит Санкт Петербург 4, Олимпик Лион 4, Бенфика 3.
Идно коло (5.11.2019 год.): Олимпик Лион – Бенфика, Зенит Санкт Петербург – Лајпциг
Група Х
Лил – Валенсија 1:1
Ајакс – Челзи 0:1
Табела: Ајакс 6, Челзи 6, Валенсија 4, Лил 1.
Идно коло (5.11.2019 год.): Челзи – Ајакс, Валенсија – Лил