Копенхаген и Вардар ќе играат по шкотски ноти во реванш мечот во третото коло квалификации за фудбалската Лига на шампиони. Европската фудбалска асоцијација (УЕФА) делегираше судиски колегиум од Островот на чело со Џон Битон од Мадервел кому ќе асистираат Грем Стјуарт и Даглас Потер. Утрешниот работен ангажман ќе биде негов прв на меѓународната сцена во оваа календарска година, но и за првпат ќе дели правда на данскиот и на македонскиот претставник.
Битон е фудбалски арбитар од 2001 година. Четири години подоцна напредува до сениорската листа во Фудбалската асоцијација на Шкотска, а во 2009 година ја достигна т.н. „категорија 1“ што му овозможи и меѓународни активности. Истата година беше еден од судиите на квалификациски турнир за европското првенство за играчи до 17 години и ја делеше правдата во финалето на шкотскиот куп во јуниорска конкуренција. Редовно е присутен на фудбалските тревници во тамошната Премиерлига и Прва дивизија.
Дебитантското искуство во Лига Европа, пак, го имаше во 2012 година во дуелот на шведски Елфсборг и Флоријана од Малта во квалификациските рунди.
Кариерата, надвор од фудбалот, ја почна како новинар пред да стане дел од секторот за односи со јавност во полицијата во Стратклајд (околина на Глазгов). Моментно е вработен во секторот за односи со јавност на Универзитетот во Стратклајд.