Голема победа на Атлетико Мадрид над Јувентус, голем пресврт на Манчестер сити против Шалке и голема работа што заврши ВАР системот на заокружување на пола осминафинална фаза во Лигата на шампиони на УЕФА.
Шпанскиот состав на „Ванда Метрполитано“ го совлада фаворизираниот ривал од Торино со 2:0. Победата беше обезбедена во второто полувреме со головите на Хозе Марија Хименез во 78. минута и на Диего Годин во 83. минута.
Главниот судија Цвајер од Германија мораше двапати да користи помош од ВАР технологијата која во првото полувреме му покажа блеф од Диего Коста во обид да изнуди пенал, а во второто и прекршок на Алваро Мората врз Џорџо Кјелини при голот на шпанскиот напаѓач во 70. минута што не беше признат по прегледување на ситуацијата во казнениот простор на Војчех Шчесни.
Шалке имаше 2:1 на полувреме, но предноста не успеа да ја задржи до крај иако во последните 20-тина минути ги одигра со човек повеќе на „Фелтинс арена“. И без исклучениот Отаменди во 68. минута, Манчестер сити славеше со 3:2 за значително олеснување на мисијата четврт-финале во реваншот.
Агеро во 18. минута, Лирој Сане во 85. минута и Рахим Стерлинг во 90. минута беа стрелци за „граѓаните“, двата гола за бундеслигашот беа дело на Набил Бенталеб од белата точка во 38. минута и во 45. минута. За двете најстроги казни во корист на Шалке беше користена ВАР технологијата.
Реваншите од вечерашните средби ќе се одиграат на 12 март.
Лига на шампиони, осминафинале, први мечеви
Атлетико Мадрид – Јувентус 2:0
Шалке – Манчестер сити 2:3
Ливерпул – Баерн Минхен 0:0
Олимпик Лион – Барселона 0:0
Рома – Порто 2:1
Манчестер јунајтед – ПСЖ 0:2
Ајакс – Реал Мадрид 1:2
Тотенхем – Борусија Дортмунд 3:0