Македонскиот главен град Скопје се наоѓа на 192-то место на листата на најскапи градови за живеење во светот, во конкуренција на вкупно 209 градови, што ја направи американската консултантска компанија „Мерсер“. Според листата од 2020 година, Скопје бил на 202 место, што претставува скок на листата од 10 места.
Најскап град за живеење во светот, според годинешното истражување на трошоците за живот спроведено од „Мерсер“, е главниот град на Туркменистан, Ашкабад, а по него следат Хонг Конг, Бејрут, Токио и Цирих.
Годишниот извештај на „Мерсер“ рангира 209 градови во светот врз основа на трошоците за живот што вклучуваат трошоци за домување, за превоз, за храна и за забава, при што е користен Њујорк како компаративна основа.
Што се однесува до најевтините градови, на „дното“ на листата на „Мерсер“ се наоѓаат Тбилиси, главниот град на Грузија (207 место), Лусака, Замбија (208) и главниот град на Киргистан, Бишкек (209).