Може ли Ливерпул да го репризира ланскиот подвиг на Рома и да ја анулира огромната предност на Барселона од првиот полуфинален меч во Лига на шампиони? – Фановите на „црвените“ го посакуваат тоа, за јавноста и неутралните е тешко изводливо, играчите порачуваат дека се кадарни и во фудбалот се е можно, но Јирген Клоп се соочува со големи проблеми пред утрешниот реванш на „Енфилд“. Германецот е свесен дека му требаат голови со оглед на големите 3:0 за Каталонците од „Камп Ноу“, но истовремено го бомбардираа со лоши вести од медицинскиот персонал.
Од порано беше познато дека Роберто Фирмињо нема да биде подготвен за настап, реваншот како и гостувањето во Шпанија го пропушта и Наби Кеита, а листата на повредени е проширена и со Мохамед Салах кој влече последици од премиерлигашкиот натпревар со Њукасл.
„Салах имаше потрес на мозок што значи дека докторите не дозволуваат да игра. Самиот вели дека се чувствува добро, но не доволно добро по лекарските стандарди. Очаен е. Ние, сепак, не смееме да паднеме во очај. Ако постои можност да минеме во финале, ќе се обидеме да ја искористиме. Тоа е наша обврска. Зад нас е добра сезона и мислам дека треба да ја крунисаме со добра игра во завршните два меча. Така и ќе направиме“, порачува Клоп.
Правилата во ФА и во Премиерлигата се јасни. Препораката е строго шестдневно мирување доколку фудбалер добие силен удар во глава и притоа претрпи одредени последици како што е случај со египетскиот репрезентативец. Па, единствената дилема што преостанува да виси е дали можеби Салах ќе инсистира на настап на сопствена одговорност.
Валверде: Не се плашиме од атсмоферата на „Енфилд“
Во отсуство на најважните поединци во ростерот на Ливерпул, на публиката и на атмосферата што се прави на „Енфилд“ се гледа како потенцијален 12 играч на „црвените“ во лов на (не)достижниот минус. Но, тренерот на Барселона е убеден дека популарниот „коп“ на стадионот нема да ги наруши мирот меѓу неговите момчиња.
„Го игнорираме резултатот од првата средба. Тоа е сигурно бидејќи, во спротивно, би било голема грешка. Свесни сме дека навивачите на Ливерпул прават голема бучава и го бодрат тимот со многу страст. Оваа сезона игравме на големи стадионо како „Олд Трафорд“ и „Сан Сиро“, па добро знаеме да се н осиме со притисокот од трибините“, вели Валверде.
Тој има на памет дека Ливерпул не загуби на домашен терен ниту еднаш во оваа сезона и дека се е отворено во реваншот. Дека се е можно во фудбалот говореше на официјалната прес-конференција за што искористи два резултатски примера на клубот што го предводи од блиското минато. Најсвежо е ланското непријатно искуство со Рома (4:1 победа на „Камп Ноу“, па пораз на „Олимпико“ со 0:3 за елиминација), но и она со ПСЖ од пред неколку сезони кога „светците“ славеа во Париз со 4:0, па Барса ги „прегази“ во реваншот со 6:1.