Деценискиот процес на децентрализација стагнира, а општините во голема мера се зависни од централната власт. Ова е заеднички заклучок од дијалогот во организација на Министерството за локална самоуправа со претставници на ЗЕЛС, градоначалници и експерти за подобрување на функционалноста на општините што овие два дена се одржува во Маврово. Особено се однесува на помалите и рурални општини на кои им е неопходен дополнителен трансфер на средства од државниот буџет за да можат да преземат некои нови надлежности. Но, истовремено е констатирано дека општините демонстрираат и низок фискален капацитет и недоволна ангажираност во прибирање на приходи од такси и даноци на локално ниво.
„Денеска сме овде за да го продолжиме дијалогот меѓу централната и локалната власт за промените што се неопходни. Едно од најважните прашања е дали надлежностите што сега се утврдени во Законот за локална самоуправа ги остваруваат општините во полн капацитет, кои се тие надлежности за кои што има потреба и услови да бидат дополнително пренесени и како сегашниот систем на финансирање да биде редизајниран на начин што нема да создава дополнителен финансиски и развоен јаз меѓу општините“, рече министерот за локална самоуправа, Горан Милевски.
На дводневната средба во Маврово присуствува и скопскиот градоначалник, Петре Шилегов кој нагласи низа заложби на ЗЕЛС. Како што истакна, се однесуваат на зголемување на приходите од данокот на додадена вредност (ДДВ) и од пресоналниот данок, средствата од игри на среќа, пренесување на нови надлежности и установи во областа на превентивната здравствена заштита, социјалната заштита, во културата, во управувањето со земјоделско земјиште, издавање на документи од матичната евиденција и друго, но и за надминување на преклопувањето на надлежности меѓу Град Скопје и општините на територија на Град Скопје.
„Неопходни се промени во надлежностите и во начинот на финансирање на општините затоа што во спротивно проблемите ќе треба да се решаваат со нова територијална организација“, рече градоначалникот на Скопје и претседател на ЗЕЛС, Петре Шилегов.
На форумот се разговараше и за механизмите и капацитетите на општините за граѓанско учество и развој на локалната демократија, како и за статусот и за начините на подобрување на функционалнаста на месната самоуправа.