Пресврт победи на Јувентус и Баерн Минхен, ПСЖ е единствен со максимален ефект и без примен гол во групата А додека Црвена звезда „настрада“ во Лондон во мечевите од третото коло во А-Д групниот сегмент во фудбалската Лига на шампиони.
Локомотив Москва беше на праг на сензација во Торино. Со голот на Алексеј Миранчук поведе во 30. минута и ја одржуваше предноста до завршницата од средбата со Јувентус. Но, старата дама, сепак, не дозволи изненадување пред своја публика и во само две минути го сврти резултатот во своја корист. Пауло Дибала погоди во 77. минута и во 79. минута за 2:1, водство што актуелниот италијански првак го сочува крајот во третиот настап во групата Д.
Баерн Минхен ја „преживеа“ Пиреја. Баварците го совлада Олимпијакос со 3:2 на неговиот стадион „Јоргос Караискакис“ и останаа лидери на табелата во групата Б. Грчкиот претставник поведе преку Мароканецот Јусеф ел Араби во 23. минута за Роберт Левандовски во 34. минута, со својот прв гол на средбата, да израмни на 1:1. Полскиот репрезентативец реализира и во 62. минута за 2:1 за тимот на Нико Ковач, а Корентин Толисо во 75. минута ја запечати победата на гостите од „Алијанц арена“. Олимпијакос до крајот успеа до втор гол (Гилјерме 79’) за ублажување на поразот.
Тотенхем се оддолжи на навивачите за дебаклот од Баерн Минхен во претходната рунда. „Спарси“ во Лондон ја поразија Црвена звезда со 5:0 во меч во кој се беше решено уште во првиот дел. Хари Кејн беше двоен стрелец за премиерлигашот во 9. минута и во 72. минута, двапати погоди и Јужнокореецот Сон Хеунг Мин (16’ и 44’), а противничката мрежа, меѓу нив, ја погоди и Ерик Ламела во 57. минута.
ПСЖ, пак, е единствената екипа со максимален ефект и без примен гол по три одиграни натпревари во ЛШ. „Светците“ со 5:0 го декласираа Бриж кој не беше ниту сенка од ремито со Реал Мадрид на стадионот „Сантијаго Бернабеу“. Хет-трик постигна Килијан Мбапе (61’, 79’, 83’), останатите два гола за парижани ги потшиша Мауро Икарди (7’, 63’).
Лига на шампиони
Група А
Бриж – ПСЖ 0:5
Галатасарај – Реал Мадрид 0:1
Табела: ПСЖ 9, Реал Мадрид 4, Бриж 2, Галатасарај 1.
Идно коло (6.11.2019 год.): ПСЖ – Бриж, Реал Мадрид – Галатасарај
Група Б
Тотенхем – Црвена звезда 5:0
Олимпијакос – Баерн Минхен 2:3
Табела: Баерн Минхен 9, Тотенхем 4, Црвена звезда 3, Олимпијакос 1.
Идно коло (6.11.2019 год.): Баерн Минхен – Олимпијакос, Црвена звезда – Тотенхем
Група Ц
Манчестер сити – Аталанта 5:1
Шахтјор Доњецк – Динамо Загреб 2:2
Табела: Манчестер сити 9, Динамо Загреб 4, Шахтјор Доњецк 4, Аталанта 0.
Идно коло (6.11.2019 год.): Аталанта – Манчестер сити, Динамо Загреб – Шахтјор
Група Д
Јувентус – Локомотив Москва 2:1
Атлетико Мадрид – Баер Леверкузен 1:0
Табела: Јувентус 7, Атлетико Мадрид 7, Локомотив Москва 3, Баер Леверкузен 0.
Идно коло (6.11.2019 год.): Локомотив Москва – Јувентус, Баер Леверкузен – Атлетико Мадрид