Стадионот „Лужники“ во Москва ќе биде покриен со 1.000 камери за време на Светското фудбалско првенство во 2018 година. Обемниот систем за видео надзор, според заменик на градоначалникот за градежништво и урбанизам, ќе биде инсталиран на трибините и во поттрибинскиот простор во 2017 година.

„На стадионот ќе бидат инсталирани преку 1.000 различни видео камери како класични така и специјални мултимедијални за покривање на голем простор“, истакна Марат Хуснуљин.

Безбедносните стручњаци, додаде тој, во командниот центар ќе го следат секое движење на трибините и во случај на потреба ќе реагираат соодветно.

„Со камерите ќе се следи општиот план како и фрагменти. Со нив ќе се обезбеди високо ниво на безбедност на трибините“, порача вториот човек на руската престолнина.

„Лужники“ ќе биде главен стадион на мундијалскиот фудбалски турнир во 2018 година. Во него ќе се одиграат четири меча во групната фаза, меѓу нив и премиерниот, и по едно осминафинае, полуфинале и мечот за титулата.