Словенија го потврди првиот случај на мајмунски сипаници, со што продолжува најголемото ширење на оваа болест надвор од Африка досега. „Н1 Словенија“ објави дека пациентот не е хоспитализиран на Инфективната клиника во Љубљана, па веројатно станува збор за поблага форма на болеста.

Заразениот маж неодамна се вратил од Канарските Острови, со кои се поврзуваат бројните случаи на зараза во Шпанија.

Научниците се изненадени од ширењето на оваа болест во развиените земји, затоа што е карактеристична за сиромашните делови на централна и западна Африка. Станува збор за ретко вирусно заболување кое вообичаено е благо и болните заздравуваат за неколку недели. Вирусот не се пренесува така лесно помеѓу луѓето, па ризикот од поголемо ширење е многу мал.

Досега се регистрирани повеќе од 100 случаи во Европа, Америка и Австралија, но Светската здравствена организација извести дека ширењето на вирусот може да се скроти.

„Ова е ситуација што може да се скроти. Пренесувањето се случува при контакт кожа со кожа и во најголем број случаи заболувањето е благо“, изјави Марија фан Керкхофе, шефицата на Одделот за новонастанати болести во СЗО.

Од СЗО велат дека нема докази дека вирусот мутирал во позаразен сој.