Последниот ден од зимскиот преоден рок донесе македонска трансфер бомба на фудбалскиот пазар. Капитенот на женската фудбалска репрезентација, Наташа Андонова (23) потпиша за француски ПСЖ, еден од водечките клубови во Европа, до крајот на оваа сезона со опција за негово продолжување. Убавата вест ја сподели и на својот Фејсбук профил со дрес на популарните „светци“ со број 15.
„Сега и официјално потпишав договор со еден од најголемите фудбалски клубови. Ветувам дека ќе го дадам најдобро од себе. Ова е најголемиот предизвик во мојата кариера. Клубот е бренд во Европа и во светот и ми претставува чест од укажаната доверба. Ветувам дека ќе се оддолжам на најдобар начин“, изјави Андонова по официјализирање на трансферот.
Андонова е родена на 4 декември во 1993 година во Неготино. По ЖФК Тиквешанка и Борец го направи и првиот меѓународен трансфер. Во 2011 година потпиша четиригодишен договор со Турбине од Потсдам и веќе во првата сезона беше втор стрелец во Бундеслигата со седум гола. Првенец го постигна против Баерн Минхен во полуфиналето во германскиот куп. За бундеслигашот одигра 73 натпревари и постигна 18 гола.
Од 2015 година до овој преоден рок го носеше дресот на Розенгард и во 34 настапи даде 20 гола за шведскиот клуб. Дебито во репрезентацијата на Македонија, чиј капитен е, го имаше во 2008 година. Во 27 одиграни натпревари досега има 12 гола. Претходно беше и во младите национални селекции (У17 и У19).
„Со задоволство соопштуваме дека клубот ја ангажира Наташа Андонова, македонска репрезентативка, која доаѓа од шведски Розенгард. Во текот на денот таа ги мина лекарските прегледи и стави потпис на договорот и ќе настапува во дресот со број 15“, се вели во веста на ПСЖ.
Андонова ќе биде во комбинација во ПСЖ само во домашните настапи (првенство и куп). Македонската репрезентативка е без право на настап во Лигата на шампиони од причина што веќе настапи за Розенгард во есенскиот дел од сезоната.