Кире Лазаров го постигна победничкиот гол во последната секунда, Филип Талески беше прогласен за МВП од организаторот на натпреварот, но таквиот епитет од јавноста оди за Никола Митрески. Со 15 интервенции и еден одбранет седмерец, чуварот на мрежата на битолски Еурофарм Пелистер постојано ги одбиваше противничките напади и беше најзаслужен за триумфот на Македонија над Украина со 26:25 во мечот од првото коло во групата Б на 14. Европско првенство во ракомет во машка конкуренција.
Македонските ракометари заминаа на одмор со плус три (13:10) по воведните пола час игра во Виена, но старата болка од настапите на големите турнири во минатото (осцилации, отсуство на трпеливост и недоволна самодоверба за преземање на одговорност од помладите) се провлече и вечерва во австриската метропола. Ниту плус петте гола разлика во продолжението не беа доволни за комотен финиш, туку одново ги раздразнија нервите на фановите и ги залепија крај малите екрани до последниот звук на сирената во „Винер Штадхале“. Поинаку, се чини, и не може од ракометните репрезентативци кои низ годините наназад ја навикнаа јавноста на дијазепам завршница, само што вечерва беше со хепиенд за добра ноќ.
Капитенот Кире Лазаров беше најефикасен со осум гола, Дејан Манасков постигна еден помалку, додека Талески ја тресеше украинската мрежа четири пати. Но, најголеми заслуги за победата одат на адреса на Митрески кој го презема „министерството за одбрана“ од Борко Ристовски.
Следува ден пауза за македонската репрезентација која во недела од 16 часот ќе игра со Чешка чија селекција попладнево загуби од Австрија со 29:32 во увертирата во групата Б.
ЕП 2020 в0 ракомет (м)
Група Б (Виена)
Македонија – Украина 26:25 (13:10)
Чешка – Австрија 29:32 (14:13)
Група Д (Трондхајм)
Франција – Португалија 25:28 (11:12)
Норвешка – БиХ 32:26 (17:12)
Група Ф (Гетеборг)
Словенија – Полска 26:23 (13:11)
Шведска – Швајцарија 34:21 (20:13)