Фудбалскиот натпревар меѓу репрезентациите на Македонија и на Косово на 26 март во Скопје и дефинитивно ќе биде без присуство на публика. Влезовите на националната арена „Тоше Проески“ ќе бидат затворени по дополнителниот сет мерки што се донесени на денешната владина седница, а по препорака на Министерството за здравство и Комисијата за зарасни болести. Оваа одлука е дел забраната на Владата која се однесува на организирање на големи собири на отворено или затворено за период од 30 дена.
Причината е добро позната – заштита на јавно здравје од опасноста за ширење на коронавирусот во земјава во која досега се регистрирани седум заболени лица, а кај дел од нив, како што соопшти министерот за здравство, Венко Филипче, и прв случај на домашна трансмисија на болеста.
Мечот меѓу Македонија и Косово, во рамки на плејофот во Лигата на нации кој воедно е квалифиакциски за пласман на Европското првенство ова лето, предизвика голем интерес во јавноста, билетите беа експресно распродадени, но домашната јавност ќе мора да се помири со новонастанатата ситуација и со „црвено-жолтите“ да пулсира преку ТВ екраните.
Победникот на арената „Тоше Проески“ на 26 март, пет дена подоцна ќе игра на гости со подобриот од натпреварот меѓу Белорусија и Грузија во финалните 90 минути за добивање на учесникот на ЕП 2020 од Д дивизијата во Лигата на нации.