Македонија ќе игра во пиринејско-балканската група Б на младинското Европско фудбалско првенство што од 16 до 30 јуни догодина ќе се одржи во Полска. Ривали на селекцијата за играчи до 21 година ќе бидат репрезентациите на Португалија, на Шпанија и на Србија.

Мечевите во групата на „црвено-жолтите“ ќе се играат во Гдинија и Бидгошч. Македонија во првиот ќе игра против Шпанија на 17 јуни, во второто коло, на 20 јуни, за противник ќе ја има Португалија и во последното коло, на 23 јуни, ќе ги одмери силите со Србија.

Групата А (градови домаќини Лублин и Кјелце) ги обедини репрезентациите на Полска, Шведска (бранител на титулата), Англија и Словачка. Германија, како најдобра во квалификациите, ќе игра во групата Ц (градови домаќини Тихи и Краков) заедно со Италија, Данска и Чешка.

Победниците во трите групи и најдобрата второпласирана селекција во нив ќе обезбедат место во полуфиналето. Финалето е на 30 јуни во Краков.