Македонското Министерство за правда сè уште е без одговор од надлежното министерство во Унгарија во врска со барањето за екстрадиција на поранешниот премиер Никола Груевски, информира денеска министерката Рената Тренеска Десковска.

„Сепак, оние пристојни рокови за одговор не се изминати. Ќе почекаме. Доколку не добиеме одговор во роковите, ќе пуштиме ургенција. Тоа се стандардни процедури што се спроведуваат. Сакам да напоменам дека досега во ниту еден случај Унгарија не одбила да екстрадира ниту едно лице. Последната екстрадиција беше во септември оваа година и немавме никаква забелешка ниту за водење на судските постапки ниту за состојбата во затворите ниту за постоење на некој ризик во Република Македонија. Се надевам дека согласно својата пракса, Унгарија ќе треба да одговори и за овој случај, рече Тренеска Десковска на прес-конференцијата со премиерот Зоран Заев на која беше промовиран нов закон за намалување на казните за прекршоци.

Поранешниот премиер Никола Груевски побара и доби политички азил во Унгарија пред да почне со отслужување на двегодишна затворска казна за случајот „Тенк“ за набавка на блиндираниот Мерцедес.