Британскиот Дом на лордови бара од Владата во Лондон да се заложи Македонија да стане членка на НАТО без оглед на тоа дали ќе биде решено прашањето за името, објавува грчкиот весник То вима во изданието на англиски јазик.
Во извештајот „Велика Британија и иднината на Западен Балкан“ на Домот на лордовите усвоен во декември лани, а објавен на 10 јануари годинава, се наведува дека Македонија треба да се приклучи на Северноатлантската алијанса заради мир и стабилност на регионот.
“Владата треба да ги поддржува мерките за да и помогне на Македонија да влезе во НАТО, со или без решение на прашањето за името”, се вели во извештајот.
Изготвен е од Одборот за меѓународни односи, кој го назначува Домот на лордовите на секоја сесија “за да ги испита меѓународните односи на Обединетото Кралство”.
“Членството во НАТО и соработката би можеле да го подобрат мирот и стабилноста на регионот. Се согласуваме со континуираната поддршка на Владата за амбициите за членство на Босна и Херцеговина и Македонија. Обезбедувајќи ги да ги исполнат условите за членство, нивното пристапување ќе биде добредојден чекор кон поголема стабилност во регионот “, се наведува во текстот.
Во извештајот се посочува на говорот на премиерката Тереза Мај, на 17 јануари лани, во кој таа “го опишува Западен Балкан како регион во кој владата на Велика Британија одигра и ќе продолжи да игра активна улога во промовирањето на европскиот просперитет, стабилност и безбедност “.
Напомнувајќи дека Велика Британија оваа година ќе биде домаќин на Самитот за Западен Балкан, во извештајот се укажува на тоа дека Лондон има намера да воспостави поцврста основа на Балканот.
“Оваа иницијатива, која доаѓа во важна фаза од преговорите со Брегзит, ќе покаже дека Владата навистина не ја напушта Европа кога ја напушта ЕУ”.
Македонија е подготвена за членство во НАТО
Во извештајот на Парламентот се презентираат и ставовите на властите во Скопје за членство во НАТО, што во извештајот се оценува како преседан во споредба со ставот кон пристапот во ЕУ.
“Во Македонија членството во НАТО е популарно (повеќе отколку членството во ЕУ). Министерот за надворешни работи, Никола Димитров, рече дека повеќе од 70 отсто од населението се залага за членство. Димитров рече дека членството ќе докаже “дека Македонија ќе опстане на ова место и во рамките на овие граници”. Сепак, напредокот кон членство беше блокиран од приговорите на Грција кон името на земјата “, се вели во извештајот, иако се истакнува дека членството во НАТО ќе биде тешко без решение.
“Ставот на Владата беше дека Велика Британија ‘ќе ги охрабри разговорите меѓу Атина и Скопје‘ … користење и идентификување на можностите каде што можеме да понудиме практична и поактивна поддршка”, се вели во извештајот.